每一次鬼上身（下）
最後，我哋達成協議。
每晚根據我嘅要求，佢哋會安排一隻有相應技能嘅鬼嚟上我身，喺鏡頭前盡情表演。
去到夜晚十二點，我就要根據佢哋嘅安排，比另一隻鬼上身，實現願望。
我開咗個直播帳號，名為「全能的俊男」，當晚就開始直播。
一個專業Dancer上身，我跳咗一段高難度嘅舞，吸引咗少少觀眾，但唯一嘅留言係：「又話俊男，點解唔俊嘅？」
唔緊要，只係第一日做直播啫，所有嘢都要慢慢嚟。
我日日都努力鬼上身……係努力做直播，地府真係人才輩出，十八般武藝咩都有。
剩係講跳舞，我以前都唔知跳舞有咁多種類。
但我搵到嘅錢……都搵唔到咩錢，名氣……討論區多咗幾個Post笑我囉，話我又唔靚仔，醜又唔夠有特色，得啲「三腳貓功夫」。
我見有啲女主播，只係對住鏡頭啜下嘴，唱啲五音不全嘅歌，就會有好多觀眾，打賞源源滾滾來，點解我做唔到？
做咗幾個月直播，鬼擁有嘅技能幾乎都表演過一次。
我愈嚟愈灰，我甚至同肥鬼商量，萌生放棄直播嘅念頭。
肥鬼叫我試多一個月，點知突然間，「全能的俊男」就多咗好多觀眾，有人留言話下次想睇咩咁。
奇怪嘅係，幾乎完全冇打賞。
觀眾人數同打賞嘅數額完全唔成比例，冇幾耐，直播平台懷疑我造假，用程式刷觀眾人數，將我嘅帳號封咗。
我嘅努力毀於一旦，我不斷喃喃自語：「點解會咁㗎？我冇咗個帳號，咁我啲fans去邊度搵我？我咪冇晒啲fans？」
「唔好擔心，無論你去到邊，你啲fans都會跟住你㗎。」肥鬼突然話。
呢句說話聽落好奇怪，我不斷質問肥鬼，佢終於講出真相。
原來，我突然多咗咁多觀眾，都唔係真嘅。
係一班鬼見我咁灰，怕我放棄直播，唔再俾鬼上身，於是佢哋偷偷通知陽間嘅親友，叫親友開住我嘅直播支持我。
但由於地府對金錢方面有嚴格規限，所以呢啲假觀眾唔可以打賞我。
我難以置信：「即係話，所有嘢都係假嘅，根本冇人欣賞我嘅才華？」
「咁嗰啲都唔係你嘅才華。」唔知邊隻鬼衝口而出。
我啞口無言。
我嘅直播路就此結束，我終於意識到，如果我本身唔擁有嗰樣嘢，再偽裝、再強求，都唔會得到理想嘅結果。
你以為我講才華？
我講「俊男」啊，我係靚仔嘅話，坐喺度溫書都大把人睇啦。
所有人都同你講，外表比內在更重要。
但現實會話你知，外表決定人哋會唔會留意你嘅內在，內在最多決定……人哋會唔會一票否決你嘅外表。
—完—
新書《筍工重生高科技》已經出版了，現正發售中，
詳情可點擊這裡：https://bit.ly/32hgoSN
你的支持是我最大的動力！
#短故 #短篇 #小說 #陳美濤 #廣東話 #粵語 #tomatochan #每一次鬼上身
Search